انا لو اشتغلت فية تاجر يشترى شغلى؟




انا لو اشتغلت فية تاجر يشترى شغلى؟

اخى . فين الكلام ده

اخى اللى عايز يشتغل بيشتغل ويلف على التجار ويعمل لنفسة سوق

اهم نقطة هو بيع المنتج فى المكان المناسب لبيعه

واختار منتج انت تعرف تخلق لنفسك سوق فيه

وما تديش حد منتج الا وانت واخد ثمنة

الحياة محتاجة مواجهة

ومش هتنجح من او يوم ولا اول اسبوع ولا اول شهر

واهم نقطة انك بتتوقع ان الشغل وانتاج التحف او خلافة سهل

لا مش سهل

بتمر بمرحلة تدريب واتقان واى حد كده ومر بكده

الدنيا مش وردى للكسلان او اللى مش قادر يواجه الشارع

ارمى الخجل وارمى الوش الناعم

البس وش الرجاله والجدعنة وادخل على الدنيا بصدرك

والله مش شعارات

اقسم بالله ان التوفيق من عند ربنا اولا

بس انت مش هتبقى مكسوف من التعامل ومن الشارع ومن التجار ومنتجك غير جيد وهتنجح …استحالة

والنجاح هو اية

هو عمل قاعدة تجار تشيل منك شغلك وتطلب منك شغل حسب احتياجها

النجاح فى وصولك بمنتجك للتجار واقناعهم بيك وبقدراتك وبالمنتج

واى حد هيقولك هاشترى شغلك بس اشتغل . خلى بالك كويس

انك هتمر بمرحلة التهدير وفهم الخامات والقوالب وفن الفنش

والدنيا مش هتيجى لحد عندك

انت اللى لازم تروح لها وتنافس عشان تاخد حقك منها بادب وعقل وعمل وكفاح

باحذر من اللى بيقولك هاخد شغلك

باحذر من اللى بيقولك هاخد شغلك

باحذر من اللى بيقولك هاخد شغلك



واساسا انت ماشتغلتش وماتعرفش هتنفع فى الشغلانة ولا لاء

ولو نفعت فى الشغلانة ومناسبة معاك

اللى قالك هاشترى شغلك هيهرب منك بالملل

هيخليك تمل من كتر الاتصال بية وتحس انك بتشحت منه وبتخسر  مش هتروحله تانى

انت بس اللى تقدر تفتح سكة وطريق لنفسك

نصيحه ليك يابنى .. اخرج من الافكار الكتير اللى فى راسك .. انزل على ارض الواقع وامشى بين الناس واتعامل وجرب وخد فكرة واحدة بس وابسط حاجة تقدر تعملها واعملها

اسمع يابنى

انا شفت من الدنيا العجب ووقعت 100 مرة وربنا يكرمنى واقف تانى وباكره الضعف و الانكسار وذل الحاجه

اقسم بالله محرت ترب اقصد مدافن لمدة سنه او ست شهور مش فاكر  . و واشتغلت فى المحارة فى المدن الجديدة نمت على رمل المحارة وطلعت اسمنت وشلت رمل سنين واشتغلت فى مصنع المونيوم ومصنع بلاستك واسطمبات الحديد والبرادة واسطمبات ماكينات حقن البلاستيك  واشتغلت اسطمبات تقطيع وتشكيل صاج والمونيوم وعلمت نفسى القوالب والجبس والنحت وعملت اكبر مصحف وعملت نوافير وشغل ميادين ومنحوتات فى اماكن راقية جدااا  وربنا كرمنى جدااا جدااا وعملت شركة مقاولات انا وصحابى سنة 2009 وفتحت بدل الورشة اثنين وثلاتة وكان معايا صنايعية وعمال كتير واصبحت فى خير عظيم من ربى   وفى عز الخير ده …..جالى مرض ربنا يحفظك وما يشوفة حد يارب عدو او حبيب ولم يتم تحديدة حتى الان رغم انى ماسبتش دكتور ولا مستشفى  والمرض ده دمرنى واهلكنى وقعدت فى البيت اكثر من سنتين ونصف

وبعت كل شء وقعدت فى اوضة بالجبس الجدران جبس  والسقف قش  وصاج قديم ودة هتلاقية فى فيديوهاتى القديمة كنت باصور فية . تصدق والله حصل . وكنت عايش انا وولادى بدون مياه وبدون كهرباء غير سقوط ابنى من عمارة الدور الخامس غير انى كنت بتوه كتير جدا ومعرفش اسمى اية ولا انا فين  ولازلت مريض لكن ارحم من الاول

وربنا اراد اقف تانى وادخل المنافسة تانى واكون فى خير الان

لا تيأس ابدا  من رحمة ربنا

توكل على الله

 

 

(مصطفى خفاجى )

 



 

سوق مبروكة – مبروكة اليوم – سوق 111-soq111